TARI ANE MARI VAAT

મનની મૂંઝવણ અને લાગણીઓની ગૂંચવણનો અસરકારક ઉકેલ લાવવામાં મદદ કરે, સંબંધોમાં સમજણ સીંચે અને તમારી લાગણીઓને યોગ્ય દિશામાં વાળે તેવી વાતોનું, જાણીતા મનોચિકિત્સક ડૉ. હંસલ ભચેચની અનુભવી કલમે લખાયેલ અત્યંત લોકપ્રિય પુસ્તક શ્રેણી ‘Relationship Builder Series’નું વધુ એક પુસ્તક... 

આપણે માણસો બહુ મઝાના છીએ. કોઈ પણ બાબતમાંથી આપણી મનગમતી કે મતલબની વાત તારવીને ખુશ રહીએ છીએ, આપણી વાત બીજાને ઠસાવવાની કોશિશ કરીએ છીએ અને અપરાધભાવથી દૂર રહીએ છીએ! બીજાની ભૂલો, નબળાઈઓ કે અપકૃત્યો આગળ ધરીને આપણી જાતને પાછલે બારણેથી સરકાવી દેવા હંમેશાં પ્રયત્નશીલ રહીએ છીએ. સંબંધોના પ્રશ્નોમાં આવી છટકબારીઓનો પાછા ખાસ ઉપયોગ કરીએ છીએ. ઝઘડતા રહેતાં યુગલો તેનો ઉકેલ શોધવાની મહેનત કરવાને બદલે 'ઝઘડા કોને નથી થતા ? ઘર હોય તો વાસણ ખખડે ય ખરાં' કહીને ગૂંચ સાથે ફીરકી લપેટી લેવાની પેરવીમાં રહેતા હોય છે! મજબૂત અને સુખી સહજીવનની અપેક્ષા રાખતા દરેક યુગલે આ માનસિકતા બરાબર સમજવી પડશે. દરેક સંબંધ 'ટુ પ્રેશિયસ ટુ થ્રો અવે'વાળી શ્રેણીમાં જ હોય છે, પરંતુ આ સમજવાનું'ય સંબંધમાં બંધાયેલા બે જણાંએ જ હોય છે. કોઈ પણ સંબંધની સાચી કિંમત સંબંધમાં બંધાયેલી બે વ્યક્તિઓને જ ખબર હોય છે. અલબત્ત, કેટલાકને એ કિંમત સંબંધના દરેક તબક્કે ખબર હોય છે અને કેટલાકને તેની ખબર સંબંધ તૂટી જાય પછી પડતી હોય છે!